Երկամսյա մասնագիտական զարգացման դասընթաց հեռախոսային կենտրոնի անձնակազմի համար

WIP – Work In Progress խորհրդատվական ընկերությունն իրականացրեց երկամսյա զարգացնող ծրագիր Mogo Armenia-ի հեռախոսային կենտրոնի աշխատակիցների համար, որի նպատակն էր բարձրացնել հաճախորդների հետ շփման որակը, ամրապնդել թիմային վստահությունը և ձևավորել ծառայության գերազանցության մշակույթ։

Ծրագրի ընթացքում մասնակիցները խորությամբ ուսումնասիրեցին, թե ինչպես է հեռախոսային կենտրոնը ձևավորում ընկերության արտաքին ընկալումը, ինչ ազդեցություն ունեն աշխատակիցների համոզմունքները և ներքին վստահությունն իրենց հաղորդակցական արդյունավետության վրա։ Դասընթացները համատեղում էին հոգեբանական մոտեցումներ, գործնական վարժություններ և իրական զանգերի վերլուծություն՝ օգնելով մասնակիցներին զարգացնել ակտիվ լսելու, համոզիչ խոսքի, հույզերի կառավարման և հաճախորդների հետ երկարաժամկետ հարաբերություններ կառուցելու հմտությունները։

Մասնակիցները սովորեցին ոչ միայն հաղթահարել բարդ կամ բացասական տրամադրվածությամբ հաճախորդների հետ շփման մարտահրավերները, այլև յուրաքանչյուր զանգը վերածել վստահության, գնահատված լինելու և դրական փորձի հնարավորության։

Դասընթացը վարում էր Վարդուհի Հարությունյանը, WIP-ի հիմնադիրն ու ղեկավար խորհրդատուն, ով համադրել էր հաղորդակցության հոգեբանության և վաճառքի մոտեցումները՝ ստեղծելով ուսուցման միջավայր, որտեղ մասնակիցները ոչ միայն զարգացնում էին հմտություններ, այլև վերագտնում էին իրենց մասնագիտական կարևորության զգացումը։

Այս համագործակցությունը դարձավ հերթական ապացույցը, որ մարդկային շփման որակը որոշում է բրենդի ընկալման որակը, իսկ ներդրումը թիմի զարգացման մեջ՝ ընկերության հաջողության հիմքը։